पहिलं पाऊल…

कोणत्याही गोष्टीची सुरुवात त्या गोष्टीच्या जिज्ञासेत असते. २८ फेब्रुवारी २००८ हा तसाच जिज्ञासेचा मंतरलेला दिवस. डॉ. रामेश्वर नाईक हे पुण्यातील ससून महाविद्यालयांमध्ये लेक्चरर असताना त्या दिवशी वॉर्डमधील पेशंट पहावे या हेतूने घरातून निघाले होते. पार्किंगमध्ये दोन सातवी-आठवीतील विद्यार्थी चेहरा पाडून बसली होती, त्यांनी मोठ्या आशेने डॉक्टरांना विचारले, काका आम्हाला युनिव्हर्सिटीत सोडाल का? तुम्हा छोट्या मुलांना युनिव्हर्सिटीत काय काम? असे विचारतात ते म्हणाले, आज २८ फेब्रुवारी जागतिक विज्ञान दिवस युनिव्हर्सिटीमध्ये “आयुका” या संस्थेमार्फत डॉ. जयंत नारळीकर सरांच्या मार्गदर्शनाखाली साजरा होतो तो आम्हास पाहावयाचा आहे. डॉक्टरांच्या डोक्यातील कुतूहल जागे झाले, त्यांनी आपला पेशंटचा राऊंड आपल्या सहकार्यास सांगून तात्काळ मुलांसोबत युनिव्हर्सिटी गाठली. तो दिवस त्यांच्यासाठी विज्ञानमय, कुतूहलपूर्ण व आनंददायी ठरला. पुढील दोन वर्ष सलग पुण्यावरून काही मुलांना सोबत घेऊन २८ फेब्रुवारीला युनिवर्सिटी येथे आयुकाचा जागतिक विज्ञान दिन पहावयास जायचे. नंतर डॉ. नाईक यांनी परभणी येथे रुग्णसेवा चालू केली. २८ फेब्रुवारी हा दिवस जसा जवळ जवळ यायला लागला तसं त्यांना आयुकाच्या जागतिक विज्ञान दिनाची आठवण होत राहीली. त्यांना असे नेहमी वाटत राहिले की परभणीतील मुलांना आयुका दाखवावे. त्यांनी हा विचार डॉ. पी आर पाटील सर, सुधीर सोनुनकर सर, अर्जुन कच्छवे सर, कमल चव्हाण मॅडम, डॉ. केदार खाटिंग सर, डॉ. राजेश मंत्री सर यांना बोलून दाखवला. त्यांनी तात्काळ होकार देताच पहिली विज्ञान सहल निघाली दैठणा या गावातील जिल्हापरिषद शाळेतील विद्यार्थ्यांना घेऊन आयुकला. सहलीतील विद्यार्थ्यांचा आनंद, जिज्ञासा व अभ्यासूवृत्ती वाखाणण्यासारखी होती. पुढील वर्षी विद्यार्थी संख्या वाढत गेली. शिक्षकांमध्ये व पालकांमध्ये या विज्ञानसहली बाबत कुतूहल वाढले व त्यांच्या मदतीची भर पडत गेली. परभणीतील विद्यार्थ्यांसाठी धडपडणारे शिक्षक जसे प्रसाद वाघमारे सर, नितीन लोहट सर, दीपक शिंदे सर, अशोक लाड सर यांनी विद्यार्थ्यांचा वैज्ञानिक दृष्टीकोन कसा वाढू शकतो याबाबत सुचवले. भौतिकशास्त्र, रसायनशास्त्र, जीवशास्त्र अशा अनेक शाखा चाचपडून झाल्यानंतर आपण सर्व शाखांना वाव द्यायचं असेल तर सुरुवात करायला हवी विश्वाच्या उगमापासून. मग डोक्यात लख्ख प्रकाश पडला व शाखा निवडायचे ठरले ती म्हणजे ॲस्ट्रॉनॉमी अँड ॲस्ट्रोफिजिक्स विषयी. पुढे हळूहळू अनेक जणांची साथ भेटत राहिली जसे ओम तलरेजा, डॉ. रणजित लाड, डॉ. बालाजी कोंढरे, ई. व आमचा चमू वाढतच राहील. परभणीत आम्ही छोटे छोटे प्रोग्राम्स जसे आकाश दर्शन, टेलिस्कोप मेकिंग, विज्ञान चर्चासत्र घेत राहिलो व आजही घेत आहोत. विज्ञान सहलीचे रूपांतर आता विज्ञानवारीमध्ये झाले आहे. प्रत्येक वर्षी न चुकता परभणी तसेच हिंगोली येथील विद्यार्थ्यांना आयुका येथे नेऊन विज्ञान प्रदर्शन दाखवले जाते.

नेतृत्व

_______

“एखाद्याला तळागाळातून पुढे आणणे, त्याला प्लॅटफॉर्म उपलब्ध करून देण्याचं खुप महत्वाचं काम परभणी अ‍ॅस्ट्रोनॉमिकल सोसायटी करते व त्यासाठी आमची टीम आणि मी स्वत: नेहमी तत्पर असु.”

टीम

_______